Постојано слушаме поплаки од земјоделските производители за неисплатливост на производството, за загуби, напуштање на површините и фармите. И статистичките податоци го потврдуваат овој негативен тренд во земјоделското производство со намалување на обработливите површини, намаленото производство и падот на добиточниот фонд.
Настрана светските трендови во земјоделското производство, ги прашавме нашите земјоделците според нивното долгогодишно искуство, што е во моментов најисплатливо да се произведува кај нас, во што да се инвестира и да се заработи.
Имаме позитивни примери кои покажуваат дека ако се одлучите за производство за кое има обезбедно пласман, квалитетот на почвата одговара за добивање високи приноси, ако инвестирате во производството и субвенциите ги користите за тоа што се наменети, во тој случај вие ќе имате рентабилно производство. Имено, земјоделското производство е како секој друг бизнис, ако се инвестира и се работи професионално, а при тоа помага и државата, тогаш ќе има и успех.
Aнкетата на Агротим може да биде и добар показател за државата и носењето стратегија, покрај стратешките кои други производства треба да се субвенционираат за да се зголеми домашното производство, на кој начин да се помогнат и да се организира Договорно производство кое е најдоброто решение и за земјоделците и за откупувачите и трговците.
Според анкетата на Агротим, најголем број земјоделски производители се изјаснија дека најисплатливо во моментов е производството на ТУТУН и објаснија.
-Тутунот е најсигурно производство, пласман сигурен, како за сите така и за тебе, не одиш по пазари или прекупци, ако се жалат дека е тежок за работа тутунот, за разлика од пред 2-3 децении сега е полесен, со машина садиш, со машина копаш, берење со аргати кои ги плаќаш со субвенциите, во картони го нагазуваш и предаваш. 10 – 15 000 евра од што друго можеш да земеш? – пишува Живко Бумбароски.
Друг земјоделец, додава дека за тутунот не треба големи површини, не бара моќна механизација, има загарантиран откуп, добри субвенции, уште работници да има, се ќе е ок – вели Марјанчо Цветкоски.
Тутунопроизводителите ја спомнаа и цената од 400 денари плус субвенции што оди во прилог на нивните изјави дека тутунот во моментов е исплатлив за производство.
Од градинарските култури, според земјоделците најголема заработка има од зелка која во овој период има висока цена, обезбеден пласман и побарувачка. Исто така информираат дека и другите градинарски култури имаат добра цена и ако се работи професионално, добро се заработува.
Мислењето на земјоделците кои одговараа на нашето прашање – Кое производство во моментов е најисплатливо, прочитајте ги во прилогот. Има и иронични одговори (се чини омилени на земјоделците) како и општо за состојбата во македонскиот аграр.
Голема благодарност до сите читатели на Агротим што се вклучуваат со сериозни коментари и сугестии во дебатите кои ги предлагаме.
