Изминатава недела имавме променливо облачно и стабилно време со повремени локални врнежи од дожд и силен северен ветар на некои места.
Во овој период потребни се повеќе врнежи. За стрнишните жита кај нас од суштинско значење се врнежите во периодот од почетокот на март до почетокот на јуни. Пченицата најголеми количини на вода троши во фазите вретенисување, класење, млечна зрелост. Фазата на вретенење се одвива во пролетниот период. Во почетокот на оваа фаза се оформуваат репродуктивните органи, од кој ќе зависи и плодоносењето, и затоа во оваа фаза растението мора да има доволно количество вода и хранливи материи. Водата исто така е неопходна и за останатите култури иако има доволно влага во подлабоките слоеви од почвата, но поради интензивниот развој на растенијата има и поголема потрошувачка на вода. Овошните култури имаат најразлични барања во однос на водата, поради длабокиот корен, па поради тоа релативно лесно поднесуват суша, но потребно е оптимална влажност во почетокот на вегетацијата за нормално цутење и формирање на плодови. Потребата за вода кај младите насади има големо значење за брз, уедначен пораст и формирање на насад со добра кондиција. Овој период е време и за садење на некои пролетни култури.
Следува период на променливо облачно и релативно топло време. Денес ќе има повремени врнежи од дожд и локална појава на нестабилност со краткотраен пороен дожд и грмежи. Во петок и во деновите од викендот времето ќе биде претежно стабилно и ќе дува умерен до засилен северен ветер. Од понеделник повторно се очекуваат локални врнежи од дожд и услови за изолирана појава на грмежи.
Доколку почвените услови дозволуваат, земјоделските производители може да почнат или продолжат со активностите и грижата за нивните посеви и изведување на работи во поле, како пролетна обработка на почвата, наводнување, уништување на плевели, внесување на ѓубрива, припрема на почвата за сеидба на пролетни култури, подготовка на почвата за сеење на топлољубивите поледелски култури, садење на одредени градинарски култури, заштита на растенијата кај овошните видови од појава и развој на болестите и штетници, редовно следење на посевите како и други агротехнички мерки.
Минималната температура ќе се движи во интервал од 2°C до 12°C, а максималната температура ќе се движи во интервал од 14°C до 25°C.
Извор: Агрометео
