Собранието вчера го донесе Законот за зоотехника со цел усогласување на домашната регулатива за сточарството во делот за одгледувањето на приплодни домашни животни со европската легислатива.
„Меѓу првите земји од регионот сме што ја усогласуваат домашната регулатива за сточарството во делот за одгледувањето на приплодни домашни животни со европската легислатива и воведуваме посебен режим за заштита на домашните автохтони видови, раси и соеви во сточарството.
Овозможуваме напредок кај признатите организации на одгледувачи на генетски чисти расни домашни животни, слободната трговија со чистокрвни животни како и регистрирање на генетските ресурси.“, рече министерот Љупчо Николовски.
Целите на новиот Закон за зоотехника се уредување на сточарството заради обезбедување на квалитетен приплоден материјал, производство на квалитетни производи од анимално потекло, производство и промет на пчелни матици, одгледување на живина за приплод, заштита на биолошката разновидност и ген банките во сточарството, како и подобрување на особините на животните, остварување на правата и обврските на одгледувачите, како и на признатите организации на одгледувачи и признати организации на одгледувачи на хибридни свињи во сточарството и уредување на прометот со приплоден материјал“, објаснија од Министерство за земјоделство, шумарство и водостопанство при најавата на Законот.
