Со 40 милиони евра годинава ќе се вработат над 16.000 граѓани – најмногу млади до 29 години. Владата го донесе оперативниот план за вработување. Премиерот очекува невработеноста да падне на 9 проценти.
„Со овој план се опфаќаат две главни точки. Првата е директна поддршка за стартап бизниси за млади, што и беше мое ветување за младите. Втората работа е организиран пристап во сузбивањето во појавата на пожари, особено присутен проблем во летниот период за што ќе се вработат 400 пожарникари кои ќе се стават на располагање на општините, каде ќе има потреба се разбира, како и дополнително вработување на 600 невработени лица кои ќе бидат ангажирани за јавни работи и општински проекти“, рече премиерот Христијан Мицкоски
Планот годинава тежи 7,5 милиони евра повеќе од лани. Министерот за економија Дурмиши потенцираше дека кај сите мерки основен предуслов е невработените да бидат евидентирани во Центрите за вработување како активни баратели на работа.
„Новина од оваа година е мерката за самовработување на млади невработени лица до 29 години. При што висината на финансиската поддршка изнесува 10.000 евра неповратни средства за отворање на бизнис“, изјави Дурмиши.
„Новина е исто така и подмерката за поддршка за самовработување со здружување на корисници до две лица да основаат бизнис. Со што висината на финансиска поддршка изнесува од 14.000 евра до 20.000 евра“.
Директорот на Агенцијата ги повика невработените и работодавачите да аплицираа за мерките.
„Првите јавни огласи ќе бидат објавени во најскоро време, а останатите ќе се објавуваат етапно по однапред дефиниран распоред и план“, изјави Сељатин Бељули, директор на АВРСМ.
Планот предвидува и поддршка за млади за практиканство, младински додаток 50 евра за млади до 23 години кои ќе работат во производство. А продолжува и мерката за поддршка на работодавачите, при вработување на млади невработени до 29 години да добијат до 250.000 денари од лице.
Извор – 21ТВ
