Агенцијата за храна и ветеринарство (АХВ) ќе спроведe две симулациски вежби „Управување со жаришта на африканска чума кај свињите кај домашната и дивата популација свињи”. Првата вежба ќе се одржи денеска и утре во Штип, а втората во четврток и петок во Битола.
Како што соопшти АХВ, симулациските вежби се организираат со техничка и оперативна поддршка на проектот „Подобрена контрола на болести кај животните и имплементација на системот за безбедност на храната“ финансиран од Европската Унија.
-Не станува збор за реална ситуација односно активностите кои ќе бидат преземени од страна на Агенцијата за храна и ветеринарство во деновите кога ќе се одржат симулациските вежби во Штип и во Битола се поврзани исклучиво со вежбата. Целта на вежбата е да се даде одговор при појава на африканска чума кај свињите, која е предмет на Плановите за итни мерки, информира АХВ.
На симулациските вежби ќе присуствуваат претставници од Агенцијата за храна и ветеринарство, од Ветеринарната комора, Факултетот за ветеринарна медицина од Скопје, претставници од Инспекторатот за ловство, Инспекторатот за животна средина, претставници од Министерството за животна средина, како и експерти од Европската Унија.
МИА
