Животните се чувствителни на високи температури, а најчувствителни се млечните крави. Тие на 25 степени Целзиусови се чувствуваат исто како ние на 40 степени.
Сточарите во Велика Британија бараат начини да ги заштитат своите животни од топлотен стрес предизвикан од високите температури. Бидејќи, на тој начин тие позитивно би влијаеле на производството на млеко и благосостојбата на животните. „Гардијан“ информира дека нашле решение во „сиестите“ во затворен простор за кравите кои во лето се на пасиштата.
Чувствителни на високи температури
За добитокот, а особено за млечните раси, топлинскиот стрес може да предизвика намалување на производството на млеко за 10 до 15 проценти, помала плодност и губење на телињата.
„Кравите на 25 степени Целзиусови се чувствуваат исто како ние на 40 степени“, вели Ед Бејли од „Џорџ Фарм Ветс“ во Вилтшир. Тој наведе дека оваа чувствителност е поврзана со органите за ферментација на храната кои постојано создаваат многу топлина.
Најчувствителни се млечните крави, додека расите на говеда за месо и овците се поотпорни. Свињите и живината главно се чуваат во затворени простори, но во Велика Британија има и голем број свињи кои се одгледуваат на отворено.
Повеќето млечни крави се чуваат на пасишта во текот на летото, а индустријата се соочува со фактот дека тоа не е секогаш добро. Ветеринарот и земјоделски консултант Том Чембрлен рече дека тие почнуваат да покажуваат знаци на стрес кога температурата ќе се искачи над 20 степени.
Сиеста за животни
Терминот сиеста е осмислен во Шпанија за да им се даде одмор на земјоделците во најтоплиот дел од денот. Токму таков концепт на заштита е пресликан и применет во сточарството.
По утринското молзење, молзните крави се пуштаат на пасење, а во најтоплиот дел од денот се враќаат во шталите. Повторно се пуштаат по попладневното молзење и остануваат на полето се додека се гледа. Така се избегнува негативното влијание на прегревање на животните.
Затворените објекти обезбедуваат подобри услови и можат да им овозможат на животните да се разладуваат благодарение на добрата вентилација, вентилаторите и разните прскалки.
Сенката на дрвјата е добра за свињите
Одгледувачите на свињи експериментираат со садење дрвја за да им обезбедат на животните сенка и место за престој во лето. Марин и Бертел Хестбјерг од Данска засадиле брзорастечка топола на која и биле потребни само пет години за да може да се користи како сенка за свињи.
Марин вели дека порано имале околу три животни кои угинувале од топлотен стрес, бидејќи свињите не се потат. Таа истакна дека сенката на дрвјата се покажала како многу ефикасна при опрасувањето, бидејќи маториците биле изложени на помал стрес.
