Екстремно високите температури и сушата која беше и сè уште е присутна во земјава, придонесоа водотеците да бележат забрзано намалување. Така, изворот Студенчица од каде со вода за пиење се снабдуваат над 160.000 жители, од истите причини во последните 30 дена забележа намалување на штедроста од над 250 литри вода во секунда, потврди за МИА, Гоце Наќески од ЈПВ „Студенчица“.
– Иако имавме солидна хидролошка година, сепак екстремно високите температури што во изминатите две седмици владеат во земјава, придонесоа изворот Студенчица од каде со вода за пиење се снабдуваат над 160.000 жители од седум општини во земјава да опадне за повеќе од 250 литри вода во секунда. Состојбата сè уште не е алармантна, бидејќи денеска на изворот беа измерени 1250 литри, сепак ако продолжи топлото време и недоволните врнежи од дожд, состојбата може наскоро и да се влоши, бидејќи допрва доаѓаат кризните месеци почнувајќи од август па се до ноември – вели Наќески и потсети на количествата на вода кои моментално се дистрибуираат до корисниците.
– Деновиве од страна од хидросистемот Студенчица кон Кичево се упатуваат 200 литри, Прилеп добива 240 литри, 185 литри се насочуваат кон РЕК Осломеј и селата, од кои 130 литри добива „рекот“. Останатите количини ги користат селата од тој регион. Кон Пласница и останатите општини се упатуваат 55 литри, додека преостанатите количини се испуштаат во реката за хидробиолошки минимум – додава Наќески.
Од комуналното претпријатие од Кичево со забелешка до водокорисниците, дека поголеми количества на вода се трошат ненаменски за полевање на бавчи и освежување на дворовите, од друга страна жителите на повисоките згради во попладневните часови, речиси да немаат вода за неопходни потреби.
Извор: МИА
