Истрагата за експлозијата што се случи во пристаништето лоцирано во градот Бејрут во Либан, според светските медиуми, укажува на небрежност при чувањето на високо експлозивен материјал, што е причина за трагедијата во која животот го загубија повеќе од 135 луѓе, а околу 5.000 беа повредени.
Причината за катастрофата е 2.750 тони амониум нитрат. Тоа е супстанција во форма на кристали, без мирис и најчесто се користи како ѓубриво, кое претставува причина за голем број на индустриски експлозии. Во земјоделството, ова ѓубриво се применува во форма на гранули кои брзо се раствораат и ги снабдуваат растенијата со азот.
Во комбинација со масла кои се користат како гориво, ова соединение создава моќен експлозив што често го користат бунтовничките групи.
Непознат извор за reuters тврди дека пожарот започнал во пристаништето и тоа во магацинот 9, а подоцна се проширил во магацинот 12 каде се чувал амониум нитрат и се случила силна експлозија.
Ова е најголемата трагедија што досега се случила во Бејрут иако тоа е град кој сè уште ги трпи ефектите од граѓанската војна од пред три децении. Тие исто така се борат со длабока финансиска криза создадена од корупција и економски лошото управување.
Амониум нитратот е причина за многу експлозии
Слична ваква експлозија, но со помал интензитет се случи во Тексас во 2013 година, во која загинаа 15 лица, а виновникот бил повторно амониум нитрат. Според Timesofisrael, 31 лица биле убиени во хемиска фабрика во Тулуз, Франција, во 2001 година од истата причина. Покрај тоа, ова соединение исто така беше составен дел од бомбите користени во нападот врз Оклахома Сити пред 25 години.
Шокантната снимка од експлозијата во Бејрут покажува црн чад, а потоа црвен. Затоа, проф. Mими Оксли претпоставува дека прво се случила мала реакција која потоа предизвикала експлозија на амониум нитрат. “Тоа е затоа што ова соединение е оксиданс. Го зајакнува согорувањето и им овозможува на другите супстанции полесно да се запалат, а самото тоа не е запаливо“, објаснува таа.
Поради оваа причина, постојат строги правила за негово складирање, а главната работа е дека мора да се чува подалеку од гориво или од извори на топлина. Многу земји во Европската унија бараат да се додаде калциум карбонат во ова соединение за да се создаде калциум амониум нитрат што е побезбеден за чување.
И покрај опасноста, проф. Оксли вели дека употребата на амониум нитрат во земјоделството и градежништвото е важна. „Немаше да го имаме овој современ свет без експлозиви и немаше да можеме да го храниме населението што го имаме денес без ова ѓубриво, но мора да бидеме внимателни како да се справиме со тоа“, заклучи таа.
Извор: Агроклуб
