Лилјана Стојанов од Зрењанин и нејзиниот сопруг пред три години купиле четири пилиња ему. Ему е втора по големина птица и може да порасне дури до два метри.
„Пилињата од Унгарија ги купивме кога имаа само четири недели, ни беше интересно да ги запознаеме. Веќе имавме гулаби, пауни… Одгледувањето на живина ни е хоби“, рече Лилјана за порталот zrenjaninski.com.
На почетокот Стојанови не го знаеле полот на птиците, а се испоставило дека се две женки и два мажјаци.
„После две години женките почнаа да несат јајца. Јајцата на емуто се темно зелени, а кога женките ќе влезат во репродуктивната фаза, што е во третата година, стануваат скоро црни. Кај овој вид е интересно што жената ги несе јајцата, а мажјакот лежи на нив и ги изведува младите. Секое јајце тежи околу 700-800 грама. Месото на емуто се користи во исхраната на луѓето. Ние не сме го пробале, ама јајца сме пржеле и многу се вкусни. Многу се барани, а цената за едно јајце се движи околу 50 евра“, вели Лилјана.
Што се однесува до исхраната, емуто не бара многу. Лилјана секое утро им меша пченка, пченица и сончоглед, ги збогатува со гранули за зајаци и тоа им е доволно за цел ден. Но како што птиците раснеле почнале да бараат поголем простор за трчање бидејќи емуто е птица тркач.
„Немаме доволно простор за нив, па сме принудени да ги продадеме. Веќе се јавуваат заинтересирани купувачи. Се надеваме дека нашите птици кои внимателно ги одгледувавме претходните три години, ќе пронајдат нов дом каде што ќе можат да се истрчаат“, вели Лилјана.
Пар возрасни птици ему достигнува цена околу 1.200 евра.
