Претседателот на Владата, Зоран Заев на денешната прес-конференција ја информираше јавноста за донесените одлуки поврзани со спречувањето на ширењето на коронавирусот во државата.
– Во пресрет на затоплувањето и претстојните празници, а со цел одморање на здравствените работници моравме да донесеме нови мерки. Бројот на новозараени расте. Бројот на починати расте. Ова е најголемото оптоварување на здравствениот систем од почетокот на пандемијата. Ова е моментот кога треба да ги пресретниме новите влошувања – рече Заев.
– Прво, забрана и посебен режим на движење од 20 часот до 5 часот наутро, почнувајќи од утре 6 април, до 20 април. Целосна забрана за посетителите на сите угостителски објекти, а продажбата на храна да се одвива со нарачки до дома или надвор од угоститителскиот објект почнувајќи од 7 април до 20 април. Исклучок се угостителските објекти на аеродромите и оние во мотелите. Целосна забрана за посетители во обложувалниците. Од утре целосна забрана и на фитнес клубовите, се забрануваат и семинарите и работилниците – рече Заев.
И министерот за економија Крешник Бектеши на својот фејсбук-профил ја сподели информацијата за престанок на работа на угостителските објекти.
„Почнувајќи од 7 април 2021 (среда), сите угостителски објекти (кафеани, ресторани, барови, клубови) ќе имаат целосна забрана за гости/посетители.
-Оваа мерка, како што денеска одлучи Владата на Северна Македонија, по предлог на Комисијата за заразни болести ќе важи до 20 април 2021 година (среда).
-Целосна забранa да примаат гости ќе имаат и хотелите, мотели, хостели, пансиони и други објекти за сместување или на бензински станици кои имаат делови за служење храна.
-Објектите кои вршат подготовка и продажба на храна може да продаваат преку онлајн или телефонска нарачка и да вршат достава на храна или самостојно подигнување на нарачката надвор од угостителскиот објект, преку пулт.
-Исклучок се рестораните во склоп на хотелите, мотелите, хостелите и пансионите за оние лица кои се сместени како гости, како и угостителскиоте објекти на Меѓународниот Аеродром Скопје и Аеродромот „Св. Апостол Павле“ во Охрид.
-Министерството за економија секогаш е за подршка на секторот, но очекува разбирање и соработка се со цел надминување на оваа ситуација.
-Препорачуваме до сите угостителски објекти да не прават дополнителни залихи денеска и во текот на утрешниот ден, со цел да се избегнат поголеми загуби од воведените рестрикции за работа, напиша Бектеши.
