Чинарот (Platanus orientalis L.) кај Кошишта е прогласен за природна реткост. Неговата старост се проценува на околу 300 години.
Од „Охридски комуналец“ соопштија дека се скршила голема гранка од стариот Чинар во населбата Кошишта, што предизвикало оштетување на дрвото што се наоѓа во близина на станбена зграда.
Екипи на јавното комунално претпријатие „Охридски комуналец“ на терен ја отстрануваат трулата гранка, која паднала ноќеска над објект и за среќа не повредила случајни минувачи.
– Општина Охрид има управувачко право со чинарите. За таа цел пролетта ангажиравме експерт за кастрење и одржување, кој направи увид и даде насоки за неговио уредување. Гранката што падна е трула. Екипи на Охридски комуналец од утрово се на терен и ја отстранија трулата гранка, информира за МИА општинската прес-служба.
Наесен, кога ќе паднат лисјата, посочија дека повторно ќе побараат стручно мислење за правилно оформување на крошната на чинарот.
На територијата на Охрид заштитени се вкупни седум стари Чинари.
