Европската Унија се соочува со уште еден проблем како резултат на војната во Украина. Санкциите што ја ограничуваат трговијата со Русија и Белорусија вклучуваат трговија со дрвена граѓа, која е потребна и за транспорт и за пакување на овошјето и зеленчукот.
Холандската асоцијација на производители на амбалажи и палети (ЕПВ) објави дека очекуваат недостиг на дрва поради развојот на настаните. Холандија увезува огромни количества дрво од Источна Европа и за очекување е дека загубата на овој обем ќе влијае на понудата на производи како палети, гајби и кутии.
Украина е главен снабдувач на оваа суровина за европската и холандската дрвна индустрија, а членовите на ЕПВ имаат блиски контакти во земјата. Пиланите со кои работат се напуштени, а во пристаништата стојат целосно натоварени камиони и контејнери.
Се предвидува дека Скандинавија, Германија и балтичките земји, кои произведуваат дрво, ќе можат да надоместат само мал дел од оваа количина, поради што ќе се појави недостиг.
Транспортот на дрва и дрвена граѓа ќе биде тешко погоден од војната и санкциите. Досегашната практика беше дека се увезувале дрва од Русија и дека натоварените камиони ги носеле потребните суровини, а на враќање камионите се полнеле со стока увезена од таа земја. Поради санкциите тоа веќе не е можно. Друг проблем е што многу возачи од Источна Европа имаат украинско или белоруско државјанство. Со нивната мобилизација во нивните матични земји, тие стануваат недостапни за економијата на ЕУ.
ЕПВ и нејзините членови се загрижени и го следат развојот на настаните. Нивниот совет е клиентите и членовите да одржуваат контакт со нивните добавувачи за да споделуваат информации за залихите, испораките и можните алтернативи.
