Аргентина ќе ги олесни ограничувањата за извозот на говедско месо, што ги користеше за да го спречи растот на цените, објави владата минатата недела, по состанокот со здруженијата на месната индустрија.
Инфлацијата во Аргентина достигна неверојатни 50%, а стапката на сиромаштија 40%, па претседателот на левиот центар Алберто Фернандез одлучи да го „заузда“ наглиот пораст на цените на храната со ограничување на извозот на говедско месо. Владата на тој начин го преполови извозот во средината на годината во однос на 2020 година, што предизвика тензии во месниот сектор.
По состанокот со четири водечки земјоделски здруженија, владата во четвртокот рече дека ќе ги укине ограничувањата за извозот на пазарите во развој и ќе овозможи неограничена испорака на месо со најдобар квалитет во Европа и во САД.
Извозот на месо што најмногу го консумираат домашните потрошувачи ќе продолжи да биде ограничен за да се спречат поскапувањата.
Најавата привремено ќе го смири конфликтот со месната индустрија која предложи инфлацијата да се стабилизира со поголема домашна понуда, односно потешки крави.
Комората CICCRA во четвртокот и предложи на Владата постепено да ја зголемува минималната дозволена тежина на кравите во моментот на колењето, со што со текот на времето ќе се зголеми количината на месо за домашна потрошувачка и извоз.
„Така, за две и пол години би го зголемиле производството на месо за 600 илјади тони со истиот сточен фонд што го имаме денес“, велат од комората.
Според сегашните прописи, добитокот во Аргентина мора да тежи најмалку 300 килограми за да биде испратена во кланица. Комората предложи пропишаната минимална тежина да се зголемува на секои шест месеци додека не достигне 400 килограми.
Аргентина е клучен снабдувач на говедско месо во светот, но и водечки производител на соја и пченка. Официјалните податоци покажуваат дека со стадо од 53,5 милиони грла извезле околу 675 илјади тони говедско месо во периодот од јануари до октомври. Дури 73,2% од извозот бил пласиран во Кина, пренесува Ројтерс.
