Русија е меѓу првите 5 светски производители на пченица и значаен извозник на тие житарки, а минатата година, без оглед на ситуацијата, нивниот извоз го надминал извозот од 2021 година за 15 отсто. Како што пишува Fastmarkets, причината е затоа што земјата се отворила за нови дестинации.
Иако темпото на извоз по инвазијата на Украина беше многу бавно, тоа беше забрзано со отворањето на коридорот за житарки, а по овогодинешната жетва, од јули до декември, извезле 24,9 милиони тони пченица, што е 3,2 милиони тони повеќе отколку во истиот период минатата година.
Главните пазари останале исти, иако забележале пад во однос на минатата година бидејќи најголемите купувачи купувале помали количини поради повисоките цени. Турција предничи со увезени 4,7 милиони тони, што е за 15 отсто помалку од 2021 година, а потоа следи Иран со 3,5 милиони. тони (-30 %).
Египет ги зголемил количините за 13 отсто, на 3,5 милиони тони.
Од друга страна, повеќе се извезувало во некои земји од Блискиот Исток и Латинска Америка, како што се Саудиска Арабија, Алжир, Пакистан, Бразил и Мексико, а по десет години се продолжени испораките во Ирак.
Покрај сето тоа, Русија забележа рекордна жетва на пченица од 105 милиони тони. Дополнителни милион тони житарки се очекуваат од моментално окупираните украински територии, соопштија официјалните власти од Русија.
Затоа, американското Министерство за земјоделство (USDA) веројатно ќе мора да ја коригира прогнозата за руската пченица за повеќе од 10 милиони тони во претстојниот извештај што се очекува во четврток, 12 јануари, како и глобалното снабдување со тоа жито, наведува Agrarheute. Сето тоа ќе влијае на цените на пазарот.
Цените на руската пченица со содржина на протеини од 12,5% и за итна испорака од пристаништата на Црното Море се се уште непроменети и изнесуваат од 307 до 311 американски долари за тон, велат аналитичарите на Sovecon.
Во 2023 година, руското Министерство за земјоделство предвидува вкупното производство на житарки од 125 до 127 милиони тони, вклучувајќи 80 до 85 милиони тони пченица. Во таа земја планираат да ја зголемат површината под пролетен јачмен за 400.000 хектари и мешунки, што главно се однесува на грашокот, за најмалку 125.000 хектари за да се одржи плодоредот. Се очекува да расте и одгледувањето на соја.
Според министерот за земјоделство Дмитри Патрушев, вкупната површина на сите земјоделски култури ќе се зголеми за околу 50 илјади хектари и ќе надмине 82 милиони хектари.
