Русија се уште не е задоволна од тоа како се спроведува договорот за извоз на житарки од црноморските пристаништа, изјави заменик-министерот за надворешни работи на Руската Федерација Сергеј Вершинин по средбата со високи трговски претставници на ОН.
- Не можеме да бидеме задоволни од тоа како се спроведува овој договор бидејќи не е отстранета бариерата за извоз на нашите производи – рече Вершинин.
Русија се закани дека ќе се повлече од договорот на 17 јули доколку не се исполнат нејзините барања за подобрување на условите за извоз на руски житарки и ѓубрива, пренесува Ројтерс.
Иако извозот на руски житарки и ѓубрива не подлежи на санкции од Запад, официјална Москва предупредува дека финансиските и логистичките ограничувања, како и тешкотиите со осигурувањето на бродскиот транспорт, сè уште претставуваат бариера за извозот на руски производи во светот.
Рускиот амбасадор во Турција пред неколку дена изјави дека и покрај тековните консултации со Обединетите нации, нема основа за продолжување на договорот за извоз на жито, пренесе RIA.
