Во гаснењето на пожарот, со големи размери, во Националниот парк „Преспа” општина Пустец, попладнево се вклучи еден од двата авиона од вооружените сили на Романија, кои денеска слетаа во воздухопловната база Кучово.
-Првата интервенција на авионот што пристигна денеска, како поддршка од Европскиот механизам за цивилна заштита, започна во Сува планина, во Пустец. Интервенцијата со авион и хеликоптер ќе продолжи, според дефиницијата за цивилни вонредни состојби, објави албанското Министерство за одбрана.
Пожарот кој се закануваше на населено место, беше ставен под контрола во тој дел, но во текот на ноќта и претпладнево силниот ветер и високите температури го засилија истиот и го проширија.
-Според информациите од теренот, пламенот уште повеќе се проширил земајќи насока кон селото Голема Горица, како и кон граничниот премин „Горица”. На терен се повеќе од 100 пожарникари, армиски и полициски сили и месното население. Единставена надеж гледаме во интервенцијата од воздух, која почна попладнево, рекоа за МИА од општина Пустец.
Пламените јазици до денеска имаат опожарени над 300 хектари.
МИА
