Се уште не може да се каже конкретно дали воениот конфликт меѓу Израел и Иран ќе предизвика ценовен шок, рече денеска претседателката на Центарот за микро, мали и средни претпријатија во Комората Габриела Кулебанова.
Во однос на новите мерки што ги најави премиерот, Кулебанова го повтори ставот на бизнисот, дека треба да се почитуваат пазарните услови на работење.
-Имаме последователни кризи. Војните траат, но во моментов за ценовен шок не можеме конкретно да кажеме, ќе почекаме зашто ова е на почеток. Ние сме мала економија, сите глобални, светски потреси и случувања се рефлектираат кај нас. Во однос на мерките што ги најави премиерот, немаме ништо конкретно. Ние секогаш како бизнис сектор се стремиме да имаме помалку влијание и ингеренции на државните интитуции, истакна Кулебанова, одговорајќи на новинарски прашања пред презентацијата на дигиталната платформа за ММСП, „ONE STOP DIGITAL“ за микро, мали и средни препријатија.
Во врска со алатката, Кулебанова објасни дека се работи за платформа која ќе биде пренесена како апликација на мобилните уртеди и преку неа компаниите за кои е наменета ќе може да ги добиваат сите информации што им се потребни, но воедно и да даваат предлози, сугестии и да поставуваат прашања.
-Ова е многу значајна алатка за овој тип компании. Преку неа ќе комуницираме и ќе ги информираме нашите членки на брз, едноставен и лесен начин за законските измени, на пример, и за се останато што е од нивен интерес. Исто така, со оглед дека комуникацијата ќе биде двострана, тие ќе имаат можност да ги предочат нивните секојдневни потреби и предизвици со кои се соочуваат. Микро, малите и средни претпријатија се клучни за брзиот раст и развој на економијата, тие ги даваат идеите за иновативни решенија и нивната поддршка е многу битна, рече претседателката на Центарот.
Дигиталната платформа со мобилна апликација е изработена со поддршка на Европската банка за обнова и развој (ЕБОР), во насока продолжување на економската транзиција на одржливи мали и средни претпријатија и развивање одржлива инфраструктура на деловни советодавни услуги.
МИА
