„Од производство на квалитетно грозје до производство на квалитетно вино”, е насловена работилницата за винопроизводители, што ќе се реализира од денеска до недела во Кавадарци, во организација на Здружението ,,Винотек”, со седиште во овој град.
– На агендата се неколку предавања од страна на стручни лица. Напредно лозарско производство и создавање на препознатливост на сортата и регионот, критични и контролни точки во технологија на производство на вино, зреење на виното, заштита на земјоделски производи и простории за преработка на земјоделски производи, појаснија организаторите.
На работилницата ќе учествуваат претставници на мали винарии и индивидуални производители на вино.
Од Здружението што се залага за промоција на производите од грозје и винскиот туризам, нагласија дека настанот е само уште еден во низата, што значат презентација на македонската винска култура и традиција.
МИА
