Претседателката на Република Северна Македонија Гордана Сиљановска-Давкова, се сретна со претседателот на Кинолошкиот клуб „Македонско овчарско куче Караман“, Илија Каров, по повод условното впишување на расата Караман во регистрите на Светската кинолошка федерација. Со ова, Караман стана дел од семејството на над 380 признати раси кучиња во светот.
Претседателот на Кинолошкиот клуб истакна дека Караман не е само ново име во меѓународните регистри, туку симбол на истрајноста, љубовта и визијата кои повеќе од две и пол децении беа вложувани во афирмацијата на расата.
Благодарност до г. Каров и до сите одгледувачи и поддржувачи кои посветено работеа на зачувувањето и признавањето на ова автохтоно македонско овчарско куче, објави на Фејсбук претседателката Сиљановска-Давкова.
Караман станува првото признато македонско овчарско куче со самостојно национално потекло, со што, дополнително се потврдува државата како земја со богато и автентично кинолошко наследство.
Караманката во мојот дом секојдневно потврдува дека станува збор за куче со изразен заштитнички инстинкт кон домот и семејството а меѓународното признание е поттик за понатамошна грижа и поддршка во насока на трајно меѓународно признавање на расата, напиша претседателката Сиљановска-Давкова.
