Според очекувањата на Здружението на земјоделци на ЕУ и Copa Cogeca, приносите на жито во Европската Унија ќе бидат намалени во 2022 година, додека приносите од маслодајни семиња ќе бидат добри. Годинешната реколта е под силно влијание на временските услови.
Вкупното производство на житни култури во ЕУ се проценува на 277 милиони тони. Тоа е пад од 4,4 отсто во однос на приносот од 290 милиони тони во 2021 година. Кога станува збор за петгодишниот просек, забележан е пад од 3,8 отсто во однос на просекот од 288 милиони тони.
Површините под лебната пченица останаа речиси исти. Засеани се 21,7 милиони хектари. Минатата година приносот беше 129,2 милиони тони, а годинава се очекуваат само 123,4 милиони тони. Најголем пад на приносот се очекува кај тврдата пченица од 14,6 отсто во однос на 2021 година.
Copa Cogeca проценува дека овогодинешната жетва на други житни култури како јачмен, ‘рж, тритикале, овес и сирак е за 4,4 отсто помала.
Влијание на временските услови
Големо влијание на приносите имаа временските прилики кое не беа погодни за овој сектор од земјоделството. Приносот на лебната пченица е намален за околу пет отсто, најмногу поради екстремниот топлотен бран што зафати области на Шпанија, Франција, јужните делови на Германија, северот на Италија, но и други земји. Во услови на високи температури и недостаток на врнежи, влагата во земјата беше недоволна за формирање на високи приноси.
Copa Cogeca ја повикува Европската комисија да ја разбере сериозноста на ситуацијата и адекватно да одговори на транспарентноста и конкуренцијата на пазарот на вештачки ѓубрива, тесните грла во логистиката и правната сигурност за земјоделците.
Добри приноси на маслодајни култури
Кога станува збор за маслодајните култури, очекувањата се позитивни. Очекуваниот принос е 32,1 милиони тони, што е за 8,5 отсто повеќе од лани и за 7,7 отсто над петгодишниот просек од 29,8 милиони тони. Ова е резултат на поголеми засеани површини за милион хектари во однос на лани. Приносот на сончогледот останува стабилен, а приносот на сојата ќе биде повисок за 9,8 отсто, пренесува Feednavigator.
Наведено е дека е се потешко производството на житарки и маслодајни култури, поради различните предизвици. Достапни се сè помалку ефикасни средства за заштита и тие се сè поскапи. Неопходно е да се создадат сорти отпорни на климатски промени, растителни болести и штетници.
