Потпишан Договор за соработка во областа на ветерина, безбедност на храна, храна за исхрана на животни и фитосанитарна политика на Западен Балкан

Заменик министерот за земјоделство, шумарство и водостопанство, Трајан Димковски имаше чест да биде дел од владината делегација на Самитот на „Отворен Балкан“ во Тирана, на којшто премиерите Заев и Рама и претседателот Вучиќ потпишаа повеќе договори кои се од огромно значење за сите граѓани од регионот.

Во рамките на Самитот, во името на Владата на Република Северна Македонија, Димковски го потпиша Договорот за соработка во областа на ветерина, безбедност на храна, храна за исхрана на животни и фитосанитарна политика на Западен Балкан.

Договорот кој го потпишаа и министерите за земјоделство на Република Албанија и Република Србија е со цел да се олесни трговијата со живи животни, храна и добиточна храна од животинско, неживотинско и мешано потекло, растенија, растителни производи и други објекти и предмети на начин што нема да влијае на мултилатералната трговија.

Исто така Договорот има цел да се заштитат териториите на земјите од внесувење и ширење на карантински штетни организми, да се спречи внесување на заразни болести кај животните, како и да се намалат на минимум фитосанитарните, ветеринарните и ризиците по здравјето.