Европската комисија на 16.12.2025 г. предложи пакет мерки за рационализација и поедноставување на законодавството на ЕУ за безбедност на храната и добиточната храна.
Овој пакет за безбедност на храната и добиточната храна ќе ги поедностави правилата и процедурите низ целата регулатива на ЕУ – од средства за заштита на растенијата и биоцидни производи, до добиточна храна, официјални контроли и здравје и благосостојба на животните. Предложените поедноставувања би можеле да донесат заштеди од над 1 милијарда евра во административни и трошоци за усогласување, вклучително и повеќе од 428 милиони евра годишно за бизнисите во ЕУ (од кои 227 милиони евра за малите и средни претпријатија), како и 661 милион евра годишно за националните администрации и администрацијата на ЕУ. Ова вклучува годишни административни заштеди од 939 милиони евра за бизнисите и националните администрации заедно, како и 150 милиони евра помалку трошоци за усогласување за бизнисите.
Предлогот ќе ги намали административните трошоци и оптоварувања, притоа задржувајќи ги многу строгите барања на ЕУ за безбедност на храната и добиточната храна, здравјето и заштитата на животната средина. Се очекува земјоделците, особено, да имаат поголем избор за производство на храна, особено кога станува збор за иновативни производи. Предложените мерки исто така ќе ги поттикнат земјоделците побрзо да применуваат поеколошки средства за заштита на растенијата.
Меѓу клучните предложени мерки се:
- забрзување на процедурите за пристап до пазарот за биопестициди, со цел земјоделците да располагаат со сеопфатен сет „алати“ за заштита на посевите;
- понасочени, поефикасни и побрзи постапки за обновување на одобренијата за пестициди и биоциди;
- во согласност со Визијата за земјоделство, работа кон усогласување на производните стандарди за увоз во однос на остатоците од пестициди, врз основа на резултатите од тековната проценка на влијанието, за да се обезбеди еднаква конкурентска позиција;
- олеснување на обврската за обновување на одобренијата за адитиви за добиточна храна и дигитализација на означувањето на овие адитиви;
- олеснување на пристапот до пазарот за производи добиени со ферментација;
- поедноставување на правилата за акредитација на официјалните лаборатории;
- примена на попрагматичен пристап кон граничните контроли за растителни производи;
- прилагодување на надзорот и мерките за ублажување на ризикот од говедска спонгиформна енцефалопатија (БСЕ) во согласност со науката.
Овие мерки одговараат на повторените повици од земјите-членки и засегнатите страни за побрзи и појасни процедури во овие области и се надоврзуваат на евалуациската работа спроведена од Комисијата. Законодавниот предлог понатаму ќе биде доставен до Европскиот парламент и Советот за усвојување.
Комисијата си постави приоритет да се справи со непотребни или несразмерни правила кои создаваат прекумерен товар за бизнисите во ЕУ и ја попречуваат иновацијата и конкурентноста, со јасна цел за намалување на административниот товар за најмалку 25% – и најмалку 35% за малите и средни претпријатија – пред крајот на овој мандат, без да се нарушат високите законодавни стандарди на Европа.
Пакетот за безбедност на храната и добиточната храна е и клучен резултат од Визијата за земјоделство и храна, претставена од Комисијата во февруари 2025 година, и директно одговара на нејзиното ветување да им помогне на земјоделците и на бизнисите со храна и добиточна храна да бидат поконкурентни и поотпорни.
https://ec.europa.eu/commission/presscorner/detail/en/ip_25_3081
