Откако Русија го раскина Црноморскиот договор за транспорт на житарки од Украина на 17 јули, почна со напади врз украинските пристаништа. Во неделата беше гранатирано пристаништето во Одеса, каде што беа уништени повеќе од 66.000 тони жито. Освен тоа, во понеделникот беа нападнати и пристаништата на реката Дунав, покрај границата со Романија, каде што била уништена и складишната инфраструктура. Поради ова, речиси 30 бродови се закотвија во близина на клучниот пристанишен терминал на Измаил, пишува Ројтерс.
Наведуваат дека осигурителните компании размислуваат дали да обезбедат заштита за пристаништата на Дунав.
А таа рута, како и патните и железничките линии од Украина до Полска, Романија и другите соседни земји, е развиена како алтернативен пат од почетокот на руската инвазија. Во изминатата година по речен пат се извезени два милиони тони житарки, односно во 2022 година 600.000 тони. Меѓутоа, тие патишта може да се користат за транспорт само на дел од она што Украина треба да го извезе, а таквиот транспорт е логистички поскап во однос на црноморскиот.
Затоа, Синдикатот на украински трговци со жито UGA апелираше до Европската Унија да го зголеми капацитетот на таканаречените патеки на солидарноста. Презентирајќи ги предлозите на својата веб-страница порачуваат дека треба да се зголемува за 1-1,5 милиони тони месечно. Исто така сметаат дека европските превозници и пристаништа вклучени во овој транзит треба да добијат делумна компензација од Комисијата во форма на субвенции.
„Тоа ќе доведе до значително намалување на трошоците за транспорт на жито и ќе им овозможи на украинските земјоделци да го извезуваат вишокот, без загуби, во земјите на кои им се потребни, со што ќе се стабилизира глобалната безбедност на храната“, соопштија тие.
Додаваат дека зголемувањето може да се постигне со извоз преку пристаништата во балтичките земји, Германија, Холандија, Хрватска, Италија и Словенија.
