Пласман за зелката има, протестот е насочен кон цената и трговците, рече денеска министерот за земјоделство, шумарство и водостопанство Љупчо Николовски.
Според него, инспекторите се на терен со цел максимална заштита на производителите.
-Го следиме откупот, нема простор за загриженост зашто пласман има. Протестот е насочен кон цената и трговците. Инспекторатот ги презема сите мерки и контроли, целосно е фокусиран во Струмичко, во градинарскиот регион за да ги заштитиме производителите. Цената не беше 10, туку 20 денари. Обидите на некои од трговците да биде дополнително спуштена веројатно предизвика загриженост кај земјоделците, но ние сме постојано на терен, ги следиме состојбите и ако треба ќе интервенираме – истакна Николовски.
Струмичките земјоделци за денеска во 12 часот најавија протестен марш со трактори низ улиците на градот и едночасовна блокада на главната крстосница. Тие пред два дена, кога ги посети директорот на Државниот инспекторат за земјоделство Зоран Шапуриќ, рекоа дека единствено исплатливо им е само ако зелката ја дадат по 30 до 35 денари за килограм. Секој откуп под таа цена, нагласија, е нерентабилен.
