Минатата недела цените на житарките нагло пораснаа и покрај постигнатиот договор за деблокирање на пристаништата на Црното Море.
Египет, најголемиот увозник на жито, откажа голема пратка од Украина, што предизвика раст на цената на пченицата која се тргуваше по 343 евра за тон, а договорите за пченка во еден момент пораснаа на 357 евра за тон.
По долго време пченката беше поскапа од пченицата, пренесува Агрархеуте.
Египет бара други добавувачи
Египет ги откажа договорите за вкупно 240.000 тони украинска пченица. Околу 85 отсто од увозот на таа земја доаѓа од регионот на Црното Море. По сите проблеми со купопродажниот договор и неможноста за испорака, очигледно е дека се бараат други добавувачи како Русија, Франција, Романија и Германија за да се зголемат стратешките резерви.
Според прогнозата на USDA, египетскиот увоз во последната маркетиншка година 1021/2022 бил 11,5 милиони тони, а во новата сезона очекуваат 11 милиони тони.
На блокираните бродови им недостасуваат морнари
Околу 80 бродови минатата недела беа заглавени во украинските пристаништа на Црното Море, а во моментов има недостиг на персонал за да ги врати во употреба. Голем број морнари беа евакуирани кога започна војната. Во украинските пристаништа на 94 бродови има околу 2.000 морнари од целиот свет.
Првите пратки украинска пченица, според договорот со посредство на ОН, теоретски би можеле да ги напуштат пристаништата на Црното Море за неколку дена. Проблемот е што малкумина морнари ќе сакаат да патуваат во регионот додека не го видат безбедниот премин на првите бродови што ќе се водат околу морските мини.
Досега седум бродови се погодени од ракети, а два се потонати. Црноморскиот регион е прогласен за ризична зона, што ги зголемува трошоците.
