Во септември многу веројатно е дека ќе бидат потпишани договори со операторите од Северна Македонија и Србија за нивно учество во Вертикалниот коридор – откри министерот за животна средина и енергетика на Грција, Ставрос Папаставру, во интервјуто за грчката телевизија „Антена“, јави дописничката на МИА од Атина.
Папаставру потсети на министерскиот состанок што се одржа на средината на мај во Атина, на кој присуствуваа министрите за енергетика на нашата земја, Србија, Бугарија и домаќинот Грција, кога беше одлучено проширувањето на Вертикалниот коридор.
Но, и на состанокот од 10 јули во Атина на претставниците на грчкиот оператор за пренос на природен гас ДЕСФА, операторите на преносните системи од земјите од Вертикалниот коридор, Грција, Бугарија, Унгарија, Украина, Романија, Северна Македонија и Србија, како и компаниите „Гастрејд“ и ИЦГБ, исто така се разговараше за конкретниот коридор.
– И Србија и Северна Македонија дојдоа на средбата на министрите што ја одржавме и ја изразија нивната желба да учествуваат. Пред десет дена повторно се сретнавме тука со операторите, а во септември е многу веројатно да бидат потпишани со операторите од Северна Македонија и Србија договори за нивно учество во Вертикалниот коридор – рече Папаставру.
Дополнително, посочи дека Грција веќе е енергетски хаб во регионот објаснувајќи дека порано во земјата доаѓале шест милијарди кубни метри природен гас, сите наменети за потрошувачка, а сега „влегуваат 17 милијарди кубни метри, од кои шест остануваат, а 11 одат нагоре“.
– На тој начин нашата земја ја искористи својата географска положба меѓу континентите и стана геополитичка сила. Тоа нема да се случи преку ноќ, но веќе Вертикалниот коридор е реалност – нагласи грчкиот министер.
МИА
