Со поддршка на Агенцијата за финансиска поддршка на земјоделството и руралниот развој ќе се рехабилитира земјоделскиот пат во месноста Средни Бавчи во Делчево.
Според градоначалникот на Делчево, Горан Трајковски, станува збор за инвестиција со која се заокружува првата фаза од циклусот инвестиции во земјоделската инфраструктура, со која за рехабилитација се предвидени над три километри земјоделски патишта.
– Во просториите на МЗШВ во присуство на министерот за земјоделство, Љупчо Николовски и директорот на Агенцијата за финансиска поддршка во земјоделството и руралниот развој, Никица Бачовски, го добив решението за реализација на проектот. Оваа инвестиција е наш одговор на барањата на земјоделците и во таа насока, продолжуваме понатаму. Ќе искористиме вакви и слични повици со кои ќе обезбедиме поддршка за решавање на проблемите на земјоделците поврзани со земјоделската патна инфраструктура во општината, истакна Трајковски.
Со ова, додаде, се решава горливиот проблем со патната инфраструктура за земјоделците кои имаат земјоделски површини или објекти во месноста Средни Бавчи.
Финансиската поддршка од Агенцијата е во износ од околу 999,7 илјади денари, а согласно со идејниот проект, ќе се рехабилитира земјоделскиот пат во должина од околу 800 метри и проширување на ширината на патот до 4,5 метри.
– Проектот ќе се реализира преку Програмата за рурален развој, мерка 124- Инвестиции во инфраструктурата за развој на земјоделството, шумарството и водостопанството, подмерка 124.3 – Инфраструктура за прстап до земјоделско земјиште, врз основа на Програмата за финансиска поддршка за рурален развој, додаде Трајковски.
Претходно, како што додадоа од Општината, преку Центарот за развој на ИПР, минатата година беше завршена рехабилитацијата на земјоделскиот пат село Вирче – село Град во должина од 1.320 метри, а со подобрување на временските услови ќе започне и рехабилитацијата на земјоделскиот пат во месноста Долни Бавчи во должина од 1000 метри.
