Во текот на вчерашниот ден беше локализиран пожарот што во понеделникот попладне избувнал во атарот на селото Крстов Дол, кривопаланечко.
Командирот на територијалната противпожарна единица Крива Паланка, Иле Коцевски рече дека пожарот зафатил голема површина борова шума, а е ставен под контрола дури вчера утрото околу десет часот.
– Со пожарот е опожарна борова шума, на површина од околу триесетина хектари. Пожарот поради топлото време се проширил многу брзо, гореа три рида, а огнот доспеал речиси до граничниот појас со Република Србија. Сѐ уште не е ликвидиран пожарот, во чиешто гасење интервениравме со едно противпожарно возило, пет пожарникари , петмина претставници од Јавно претпријатие „Национални шуми, подрачно шумско стопанство „Осогово”, Крива Паланка, рече Коцевски.
Во гаснењето учествувале и екипи на ПЕ на центарот за управување со кризи, Крива Паланка.
Конкретната опожарена површина и причините за настанување на пожарот ќе бидат дополнително утврдени.
