Обединетите нации вложуваат максимални напори да обезбедат продолжување на Црноморскиот договор за извоз на жито и меморандумот за разбирање за да се олесни пристапот на руските ѓубрива и другите производи на глобалните пазари, изјави генералната секретарка на Конференцијата на Обединетите нации за трговија и развој, Ребека Гринспен.
-Мора да продолжиме да ги намалуваме цените и да имаме стабилни пазари за храна и ѓубрива во светот – изјави Гринспен во Женева, пренесе Ројтерс.
Таа нагласи дека Обединетите нации остануваат посветени да вложат максимални напори за продолжување на договорот.
-Ќе размислиме за одење во Москва во деновите кои преостанаа, но тоа се уште не е потврдено – рече Гринспен.
Москва не гледа причина да продолжи да го спроведува договорот, кој истекува на 17 јули, објави во вторникот руското Министерство за надворешни работи, пренесе Спутник.
Од Министерството наведуваат дека „ситуацијата со нормализацијата на руските испораки на храна и ѓубрива на светските пазари е таква каква што е предвидена со Меморандумот на Русија и ОН, продолжи да деградира“.
-Во овие услови, очигледно е дека нема основа за натамошно продолжување на Црноморската иницијатива, која истекува на 17 јули – посочуваат од Министерството.
Во соопштението се истакнува дека „истовремено, руската страна продолжува совесно и одговорно да пристапува кон своите обврски, ги прави потребните напори во строга согласност со процедурите за да можат сите бродови кои учествуваат успешно да ја завршат својата мисија и да го напуштат Црното Море до крајот на важење на процедурите“.
Како што истакнуваат од Министерството за надворешни работи на Русија, на Запад јавно изјавуваат дека нема отстапки на тема антируски санкции, вклучително и храна и вештачи ѓубрива.
Договорот за храна, кој беше потпишан на 22 јули 2022 година од претставници на Русија, Турција, Украина и ОН, вклучува извоз на украинско жито, храна и ѓубрива преку Црното Море од три пристаништа. Со координацијата на бродскиот сообраќај се занимава Заедничкиот координативен центар во Истанбул.
Пакетот на овие документи предвидува укинување на ограничувањата за извоз на руски земјоделски производи и ѓубрива на светските пазари, а исто така го одредува алгоритмот за безбедно излегување на комерцијалните бродови од пристаништата на Црното Море под контрола на Украина долж специјално отворените хуманитарни поморски коридори од 18 март 2023 година.
Русија ја продолжи важноста на договорот за 60 дена – до 18 мај, а Украина инсистира дека договорот е продолжен за 120 дена.
