Националната федерација на фармери со поддршка на Шведската организација за развој We Effect денеска во Дојран ќе го одбележи Меѓународниот ден на руралните жени.
Најавени се обраќања на претседателот на Националната федерација на фармери Стеванче Јорданоски, министерот за земјоделство, шумарство и водостопанство Цветан Трипуновски и директорката на We Effect за Латинска Америка, Европа и Палестина, Пиа Ставас Мајер.
Ќе се одржи и панел дискусија на тема „Родова еднаквост во руралните средини – предизвици и можности“, на која ќе учествуваат Билјана Петровска-Митревска, проектна менаџерка во Националната федерација на фармери, Дарко Тишовски од Агенцијата за финансиска поддршка во земјоделството и руралниот развој, земјоделките Вангелина Пармачка и Лидија Богдановска, како и Фадрије Мустафовска, претседателка на Здружението „Радика Де“.
Во рамки на панел-дискусијата ќе биде презентиран регионалниот извештај „Преглед на положбата на руралните жени во земјите од Западен Балкан“, кој нуди сеопфатен увид во состојбата и елаборирање на предизвиците и можностите за унапредување на положбата на жените во руралните средини низ регионот.
Ќе бидат доделени и благодарници за успешна млада земјоделка од рурална средина, за три успешни операторки за храна, за активистка која со години го подига гласот на руралните жени и е долгогодишна членка на Националната федерација на фармери, како и благодарница за заложба и борба за еднакво општество без сиромаштија.
На настанот ќе биде претставена и новата регионална координаторка на Мрежата на НФФ за жените фармери.
Меѓународниот ден на руралните жени беше назначен во 1995 година на 4. Светска конференција за жени во Пекинг, а беше прогласен за официјален ден во 2007 година од страна на Генералното собрание на ОН.
