Акумулационите езера Липково и Глажња, од каде Куманово се снабдува со вода за пиење, се преполни со вода, која се прелева преку браните, но надлежните велат дека нема опасност од излевање на реките Липковка, Којнарка и Кумановка.
Од ЈП „Водостопанство Кумановско-Липковско Поле“ кажуваат дека браните се преполни од март, поради што тие сите овие месеци вршат контролирано испуштање на водата за да не се загрози нивната сигурност, но истовремено и да не дојде до преполнување на реките.
„Ако во јуни минатите години се прашуваме ќе има ли доволни количини на вода да го истуркаме летото, оваа година прашањето е што ќе правиме со толку многу вода. Поради обилните врнежи браните се преполни, но засега нема опасност од неконтролирано излевање. Ние го контролираме испустот на вода според нивото во реките и засега нема опасност од поплави во кумановско-липковскиот регион“, вели Оливер Илиевски, директор на ЈП „Водостопанство Кумановско-Липковско Поле“.
Тој додава дека има најава од хидрометеоролозите дека наредните денови ќе има обилни врнежи од дожд во Јужна Србија, што може да го зголеми нивото на вода во реката Пчиња и евентуално да направи проблеми во пониските делови.
И од Регионалниот центар за управување со кризи (РЦУК) потврдуваат дека е зголемен водостојот во сите реки во Кумановско, но засега нема опасност од поплави.
Извор: kumanovonews.mk
