Во проектот ProGrün на Универзитетот Хохенхајм, истражувачите произведоа храна за живина богата со протеини од трева која може целосно да ја замени сојата. Досега, тревата и другите зелени растенија можеа да ги консумираат преживарите и да имаат корист од аминокиселините што ги содржат.
„Составот на аминокиселините во протеинскиот екстракт приближно одговара на оној на сојата“, објаснува проф. д-р Родехутскорд, од Одделот за исхрана на животните во Хохенхајм. Тој изјави дека се работи за производ кој е погоден за исхрана на живина и свињи.
За екстракција се користел биорафинерски тест објект. Од околу 45 тони свежо искосена трева успеале да извлечат вкупно еден тон од оваа храна.
Првиот чекор бил да се исецка тревата, а потоа ја пресувале. Сокот што го добиле содржел високо ниво на растворливи протеини, како и разни други состојки. Во експериментот, две третини од протеинот останале во пресуваната погача. Со првите 50 килограми ја хранеле живината која добро ја прифаќала ваквата храна.
Долгорочно, протеинскиот екстракт може да се користи во исхраната на луѓето, а се очекува да се користи и во биоекономијата како пластика на биолошка база, за хартија, ѓубриво или како енергија.
За разлика од обработливото земјиште, користењето на пасиштата не е во конкуренција со производството на храна. Се очекува дека ова откритие би можело да го намали увозот на соја од странство. Азотните соединенија кои се извезуваат со добиточна храна недостасуваат во земјите производители, додека во Европа има вишоци во вид на органски ѓубрива.
