Во третата еко-акција „Генералка викенд“ што од 12 до 14 мај 2023 се одржа на 304 локации во 51 општина и во Националниот парк Шар Планина, се собрани 252 тони отпад. Министерот за земјоделство, шумарство и водостопанство Љупчо Николовски ја нарече акцијата „импозантна и благородна“ за чистење на земјата од отпад и соопшти дека меѓу целите за оваа година им е зелената транзиција односно за секои 10 килограми отпад да се засади едно дрвце.
Планот на МЗШВ, рече Николовски, е низ државата да бидат засадени минимум 1,8 милион дрвца – за секој жител во земјава од последниот попис.
-За оваа есен имаме 400 хектари подготвени. Потежок дел од работата е како да ги лоцираме и како тоа стручно да биде направено. Ги мобилизиравме сите стручни капацитети, со цел по неколку години да ги знаеме точните ефекти од ова што го правиме, тоа да не биде популистичка или импровизирачка активност, туку да имаме јасна цел. Ќе продолжиме со поддршка на оваа активност, со онолку дрвца колку што ќе биде потребно на секои десет килограми отпад, рече Николовски.
За иницијативата, рече, им требаат многу партнери и ги покани сите што сакаат да се вклучат оваа година. Како што соопшти, МЗШВ веќе има произведено 800 илјади садници.
-До есента нашиот план за производство е уште ден милион садници и планот е за секој жител од последниот попис да засадиме едно дрвце низ државата.
Еден милион и 800 000 дрвца ни е минимум зададен таргет да ги засадиме. Работиме на обезбедување површини – по текот на реката Вардар, на сите оголени и опожарени површини итн. Овие садници ги посветуваме на новата шума Сончева Гора, која ќе никне оваа есен.
Пошумувањето значи создавање на нов живот, ќе никнат уште многу сончеви гори., додаде Николовски.
