Министерот за земјоделство, шумарство и водостопанство, Љупчо Николовски, по враќањето од Белград, каде што во текот на вчерашниот ден имаше работна средба со српскиот вицепремиер и министер за земјоделство, Бранислав Недимовиќ на која е договорено во следните 7 – 10 дена да се тргне забраната за извоз од Србија во Македонија и да почне испораката на договорените количини пченица, пченка, брашно и масло за јадење, утрово гостуваше во Утрински брифинг.
„Отворен Балкан ни помага да постигнеме договор со Србија да се тргне нивната забрана за извоз на пченица, што ни овозможува да увезуваме оттаму. Граѓаните треба да имаат доверба во институциите, Отворен Балкан ни нуди извонредна можност во време на светска криза, и затворени сите светски пазари, ние да имаме отворен пазар“, рече министерот Николовски и додаде дека на средбата се разговарало и за обезбедување ѓубриво за земјоделството.
„Нашиот целосен фокус е да обезбедиме храна за нашите граѓани и за тоа се вклучени сите алатки. Се договараат и други извори и пазари. Околу 50.000 тони пченица се потребни до жетва. Тоа вчера што го договоривме со Србија е тргање на забраната, тргање на бариерата кон РСМ и исполнување на сите овие договори помеѓу трговските партнери за пченица, за пченка, за масло за јадење, за брашно, што е особено важно. Важно е да се знае дека има и пченица и масло, а домашното производство на пченица е зголемено со помош на владините субвенции“, рече Николовски.
Министерот додаде дека фокусот е целосно на зголемување на производството на стратешките култури, за што веќе до Министерството за финансии е доставен план што е тоа што треба да се направи на среден и на долг рок. Со планот се предвидени мерки кои ќе придонесат за зголемени приноси од 30.000 тони пченица на среден рок и на долг рок Северна Македонија да не е повеќе увозно зависна од пченица.
„Ние сме имале и 200.000 хектари со пченица, но сите процеси, транзиција, режим, затварање на агрокомбинати, незаинтересираност на младите и многу други фактори влијаеле на намалување на површините кои сега се зголемуваат. Но, сега со сите политики и мерки што ги преземаме имаме зголемувања на производството. Имаме огромен пораст и на преработките на зеленчук и овошје, од 60 милиони евра извоз, сега истиот е зголемен на 74 милиони евра. Или кај тутунот што е стратешка домашна култура, девизниот прилив сега е 120 милиони евра“, изјави министерот Николовски, додавајќи дека фокусот е целосно на зголемување на производството на стратешките килтури, за што веќе до министерството за финансии е доставен план што е тоа што треба да се направи на среден и на долг рок. Со планот е се предвидени мерки кои ќе придонесат за зголемени приноси од 30.000 тони пченица на среден рок и на долг рок Северна Македонија да не е повеќе увозно зависна од пченица.
Николовски рече дека тема на разговор во Белград бил и увозот на рафинирано и нерафинирано масло.
-Ние разговаравме со сите комори, со сите компании коишто се засегнати и точно е, и ова е дел од договореното вчера дека и увозот на рафинирани и нерафинирано масло за јадење ќе биде на листата на производи за коишто ќе биде тргната забраната и ќе биде овозможен увоз, паралелно сите мерки и политики и пакетот за поддршка на граѓаните за ослободување од ДДВ и замрзнување на цени, ќе придонесе да има смиреност, да нема грижа, ќе има доволно храна и има доволно стратешки продукти. Ние сме имале и 200 илјади хектари со маслодајни култури, но низа фактори во изминативе 30 години влијаеле да се намалат површините. Тоа важи и за другите култури. Тој тренд сега се менува, нашиот фокус сега се стратешките култури и имаме план за среден и долг рок. На долг рок да го намалиме увозот, а на среден рок да се зголемат земјоделските површини и приносот – рече министерот.
Николовски повторно апелираше до граѓаните да не се грижат бидејќи ќе има доволно пченица, пченка и масло за јадење.
„Фокусот е да обезбедиме храна и храна ќе има, и пченица, пченка и масло за јадење ќе има во доволни количини и заради тоа што се зголемува домашното производство. Од 2017-2021 имаме зголемено производство на пченица од 190.000 на 250.000 тони. Оваа година сеидбениот план е реализиран, ќе имаме нешто зголемени површини, проценката е дека ќе имаме околу 255.000 тони домашна пченица. Меѓутоа, неопходна е и пченицата што е со друг квалитет и која домашната мелничка индустрија ја меша со нашата, но со политиките и мерките коишто ги правиме се зголемува домашното производство.“
