На прес-конференцијата на премиерот Димитар Ковачевски, присуствуваше и министерот за земјоделство, Љупчо Николовски, кој одговараше на новинарски прашања.
На прашањето како ќе влијае забраната за извоз на пченица од Србија на нашата земја, министерот Николовски рече дека од кабинетот на Владата на Србија добил потврда дека тоа нема да важи за договорените, количини на пченица што се потребни во нашата мелничка индусртриј.
„Претставници на кабинетот на Владата на Србија потврдија дека Србија утре ќе донесе соодветна одлука, меѓутоа се потврди дека таа нема да важи за договорените, потребните количини на пченица што се потребни во нашата мелничка индусртрија, односно дека одлуката нема да важи за регионот и се испрати повторно порака на смиреност. Имаме доволно залихи, 45.000 тони пченица, над 10.000 тони пченка, околу 9.000 тони јачмен затоа што имаме одлично домашно производство. Ги споредивме сите информации со останатите министри од регионот и добивме уверување од претставниците на Србија дека ќе се грижат како ние, така и тие за обезбедување на неопходните продукти, во овој случај пченицата и останатите житни култури за целиот регион“, рече Николовски.
На прашањето дали по интервенирањето за пченицата се размислува истото да се направи и за другите производи, односно за овошјето што се извезува во Русија и Украина, Николовски рече дека извозот во Русија и Украина е со помал обем.
„Министерството заедно со сите сектори ги прави сите анализи за бројките, односно производите кои последните години се извезуваат во Украина и Русија. Се работи за извоз со помал обем, во Украина 0,6 и околу 1 процент во Русија од вкупниот извоз на земјоделско-прехранбените производи. На време, заедно со сите останати мерки ќе излеземе и ќе бидеме тука за сите категории на земјоделски производители за да обезбедиме сигурен пласман. Сите анализи се прават и верувам дека сите разговори ќе вродат со плод, а дополнително Владата во следниот период ќе размислува и за другите интервентни мерки во делот на земјоделството“, одговори Николовски.
