Денеска е отворен Јавниот повик за мерката Бизнис план во земјоделството, кој како што изјави министерот за земјоделство, шумарство и водостопанство, Љупчо Николовски, е прв во низата повици за Бизнис план, кои континуирано ќе се реобјавуваат секој месец до крајот на годинава.
„Партнерски со земјоделците ја креиравме мерката бизнис план во земјоделството. Мерка која ги поддржува индивидуалните земјоделци чија основна дејност е земјоделството.
Поддршката е во форма на кофинансирање во висина до 10.000 евра по корисник и истите можат да се искористат за набавка на земјоделска механизација, пчеларска опрема, силоси, опрема во објекти за производство на храна од животинско или неживотинско потекло, опрема за навигација и смарт земјоделство на постоечки трактори, комбајни и приклучна механизација, машини за разбивање на мраз, инвестиции во објекти на фарми за обновливи извори на енергија за сопствена потрошувачка, опрема за производство на тутун, како и набавка на хардвер и софтвер за примарно земјоделско производство.“, појасни министерот Николовски.
