Делегација на Министерството за земјоделство, шумарство и водостопанство (МЗШВ) предводена од министерот Љупчо Николовски, оваа недела во Брисел ќе одржи повеќе билатерални средби помеѓу Европска Комисија и Македонија, за поглавјето 11 – земјоделство и рурален развој.
Пристапните преговори во Земјоделството се претежно фокусирани на процедурите за идните директни плаќања, поддршка на руралниот развој и потребата од преодни мерки кои ја олеснуваат интеграцијата на земјата во Европската унија. Поглавјето за Земјоделство и Рурален Развој опфаќа голем број на обврзувачки правила кои се директно применливи.
„Денеска од Брисел порачуваме дека за нашата земја нема друга опција освен европската. Ги започнавме билатералните скрининг средби од областа на земјоделството и руралниот развој.
Според Извештајот за напредокот од #ЕК за 2022, Република Северна Македонија има значаен напредок во областа на земјоделството и руралниот развој. Доказ за тоа е и лидерското место по искористеност на #ИПАРД средствата, и почетокот на #ИПАРД 3 со двојно повеќе обезбедени европски средства. Преку #ИПА програмата бележиме значајни капитални проекти за модернизација на водоснабдувањето на земјоделските површини, процесот на консолидација е уште еден успешен проект преку ИПА, кој е веќе успешно реализиран во 14 региони.
Секоја мерка и политика што министерството ја креира изминативе години е во директна координација со земјоделците, приближувајќи се кон европски стандарди и политики. Како министер силно сум посветен да го приближиме македонското земјоделство до европското.
По успешното членство во НАТО, евроинтегративниот процес е високо поставена стратешка цел на која сме целосно посветени и подготвени. Не отстапуваме од целта да ја видиме Северна Македонија и македонскиот народ во Европската Унија“, напиша на социјалните мрежи министерот Љупчо Николовски.
