Откако групата производители SNFS предупреди дека недостигот на дизел, кој влијае на вадењето на шеќерна репка може да доведе до застој во работата на фабриките, француската влада ги ослободи стратешките резерви на гориво за производителите на шеќер, пренесува Ројтерс.
Имено, бензинските пумпи останале без резерви поради штрајковите на работниците во рафинериите „TotalEnergies“ и „Exxon Mobil“, што го наруши вадењето, преработката и испораката на шеќерна репка.
Владата ги искористила своите резерви за снабдување на оние кои останале без гориво.
Горивото неопходно за земјоделците
Фабриките за шеќер во Франција вообичаено работат од септември до крајот на јануари или почетокот на февруари. Нивната работа се заснова на доволно снабдување на земјоделците со потребното гориво за вадење на шеќерна репка и транспорт до погоните за преработка.
Сезонава во Франција одлучиле порано да почнат во кампањата за преработка на оваа земјоделска култура. Причината се можните енергетски ограничувања што планира да ги воведе нивната влада, во случај Русија да го прекине снабдувањето со гас.
Најголемиот француски производител на шеќер, „Tereos“, морал да го забави производството во некои фабрики откако „TotalEnergies“ рекол дека нема да може да испорача дизел. На „Cristal Union“, вториот по големина производител, сопствените залихи му овозможиле да ги одржи стапките на производство минатата недела, но ги искористиле стратешките резерви во текот на викендот.
„Ние објаснивме дека има загрижувачки тензии кои ризикуваат да доведат до привремено затворање на фабриките“, рекол претседателот на SNFS, Кристијан Шпигелеер, по состанокот меѓу производителите на шеќер и францускиот министер за земјоделство Марк Фесно. Тој додал дека државата се согласила да користи стратешки залихи за недостатокот на дизел да не се одрази на работата на фабриките.
Од Министерството за земјоделство не ги коментираа последните случувања.
