Општина Неготино организира натпревар за најдобри вина и ракии од индивидуални производители и семејни винарии, информираше денеска Методи Митрев, портпарол во локалната самоуправа.
-И годинава ќе се дегустираат вина и ракии од индивидуални производители. Настанот е во рамките на одржувањето на манифестацијата „Неделата на виното-2023 година“. Овој настан општина Неготино го организира по повод 14 февруари, празникот на лозарите и винарите „Свети Трифун“. Ќе биде организиран натпревар во дегустација на бели, црвени и розе вина од реколтата 2022 година и ракии од индивидуални производители и семејни винарии. Право на учество имаат производители од Македонија, соопшти Митрев.
Натпреварот ќе се одржи на 10 февруари, а мостри на ракија и вина можат да се достават најдоцна до деветти февруари, во зградата на општина Неготино.
– Пристигнатите мостри ќе бидат дегустирани и оценувани од стручна комисија составена од членови на Здружението на енолози на Македонија. За производителите на најквалитетни ракии и вина се предвидени награди и признанија, ќе им бидат доделени на централната прослава, што ќе се одржи на 14 февруари на градскиот плоштад во Неготино, појасни Митрев.
