Вкупните средства на останатите финансиски институции (ОФИ) во вториот квартал од годинава достигнаа 336,4 милијарди денари, што претставува квартален раст од 7,2 проценти и годишно зголемување од 22,1 процент, покажуваат најновите податоци на Народна банка.
Според податоците, средствата на ОФИ се зголемени за 22,7 милијарди денари во однос на претходниот квартал и учествуваат со 23,3 проценти во вкупните средства на финансиските институции во земјата. Најголемо учество во структурата на ОФИ имаат пензиските фондови со 63,7 проценти, а по нив следуваат осигурителните друштва со 13,5 проценти.
Од Народна банка посочуваат дека растот главно се должи на повисоките средства на пензиските фондови, додека позитивни движења се забележани и кај останатите потсектори, освен кај финансиските друштва кои евидентирале квартален пад.
Во вториот квартал средствата на пензиските фондови достигнале 214,3 милијарди денари и се зголемени за 8 проценти на квартално и за 21 процент на годишно ниво, главно поради повисоки вложувања во сопственички и должнички хартии од вредност.
Средствата на инвестициските фондови бележат највисок раст меѓу поголемите потсектори и изнесуваат 35,6 милијарди денари, што е за 12,3 проценти повеќе на квартално и за 44,2 проценти на годишно ниво. Истовремено, средствата на осигурителните друштва се зголемени за 3 проценти квартално и за 8,8 проценти годишно.
Кај финансиските друштва е регистриран квартален пад на средствата од 1,1 процент, иако на годишно ниво е забележан раст од 30,3 проценти. Средствата на друштвата за финансиски лизинг се повисоки за 4,8 проценти на квартално и за 21,7 проценти на годишно ниво.
Најголем дел од средствата на ОФИ се пласирани во должнички хартии од вредност, кои учествуваат со 49,3 проценти, и во сопственички хартии од вредност со учество од 28,5 проценти. На страната на обврските, најголем удел имаат техничките резерви на осигурувањето со 49,4 проценти и капиталните сметки со 40,4 проценти.
МИА
