Русија, најголемиот светски извозник на пченица, значително ја намали извозната квота за почетокот на 2025 година. Како што пренесуваат светските медиуми, овој потег би можел да има големо влијание на светските пазари на храна и потенцијално да влијае на цените на лебот ширум светот.
Новата извозна квота ќе важи од 15 февруари до 30 јуни и овозможува извоз на 10,6 милиони тони пченица, што е значително помалку од вкупно 29 милиони тони жито лани, пренесува Политика.
Сепак, прогнозите се дека во втората половина на следната година земјата би можела да извезе уште 25 милиони тони пченица, доколку се опорават зимските култури и жетвата биде на задоволително ниво, објави неодамна Рускиот сојуз на извозници и производители на жито.
За глобалните пазари, сето ова претставува огромна неизвесност. Аналитичарите посочуваат дека големите увозници во првата половина од годинава, како Египет и Турција, ќе се борат за нови добавувачи. Другите земји извознички би можеле да ја искористат можноста да го прошират својот удел на пазарот. Ова може да предизвика поскапување на лебот во многу земји.
Додека Русија го ограничува извозот на пченица, светот мора да се прилагоди на новата реалност во трговијата со жито. Следните месеци ќе го откријат влијанието на оваа промена на политиката и на меѓународните пазари и на потрошувачите и нивните буџети – се наведува во извештајот
