Франција пријави најслаба жетва на пченка во последните 30 години. Статистичката служба на француското Министерство за земјоделство Agreste ја намали проценката на француската жетва на пченка на 11,3 милиони, што е најслабата сезона од 1990 година, пишува reussir.fr.
Годинава производството на пченка во зрно ќе биде намалено за 25,3 отсто на годишно ниво и за 16,6 отсто во однос на петгодишниот просек, во набљудуваниот период 2017-2021 година. На тоа најмногу влијаеле високите цени на ѓубривата и екстремната суша.
Француското здружение на производители на пченка AGPM очекува жетва под 11 милиони тони, што претставува историски низок принос.
Понизок принос и во САД
Откако минатата недела цените на пченката паднаа под притисок на залихите од Украина и добриот принос во Јужна Америка, сепак повторно дојде до нивен раст. Кога USDA во својот извештај ја намали проценката на американскиот род на 354 милиони тони поради сушата која зафати некои држави, дојде до пораст на цените на американските берзи, пишува Agrarheute.
Се очекуваше Јужна Америка да има високи приноси на пченка и соја. Сепак, Бразил ја намали проценката на жетвата на 113,3 милиони тони. Се стравува и дека црноморските пристаништа повторно ќе бидат блокирани.
Сето тоа предизвикува секојдневни осцилации на пазарот. Така, денеска, 20 септември, тон на Париската берза чини 328 евра, а на Чикаго 266,37 евра.
Украинските залихи ги намалуваат цените
Според податоците на Државната царинска служба на Украина, од 1 јули до 14 септември извозот изнесува околу 5,8 милиони тони житарки и мешунки.
Минатата година изнесувал 10,93 милиони тони, од кои 2,3 милиони тони во септември, додека годинава се извезени 1,83 милиони тони пченица и 3,4 милиони тони пченка.
Има големи залихи на пченка од претходната жетва. Според проценките, тие изнесуваат од 5,3 до 5,5 милиони тони за пченица, 1,1 за јачмен и 7,7 милиони тони за пченка.
