Пред почеток на новата земјоделска сезона, главниот проблем – пласманот на земјоделските производи е повторно во рацете на трговците и извозниците. Во услови на неорганизираност од страна на земјоделските производители, нефункционирањето на Договорното производство, стихијниот пласман повторно ќе биде препуштен на трговците и нивната способност да освојуваат странски пазари и да се носат со нелојалната конкуренција со високо субвенционирани земјоделски производи од земјите членки на ЕУ.
Кога на ова ќе се додадат и проблемите кои ги создаде војната во Украина, развојот на земјоделското производство во регионот, пред нив е предизвикувачка година.
-Генерално, трговците од 2025 година не сме најзадоволни, бидејќи на пласманот влијае војната меѓу Русија и Украина, односно во двете земји не можеме да извезуваме. Остануваат соседите и поранешните ју-простори, но мора да се знае дека веќе секаде има производство. Албанија е веќе градинарска сила и оттаму можеш во секое време да купипш седум-осум производи. Тоа се должи на подобрите климатски услови за разлика од кај нас и затоа имаат порано производство, дури пред земјите од цел Балкан, вели за МИА Благој Витанов, трговец и извозник од Струмица.
Тој очекува во 2026 година да продолжи трендот на успешен пласман на македонските градинарски производи, но никој не може да каже колкави и какви ќе бидат цените.
Според оценката на Министерството за земјоделство, шумарство и водостопанство, градинарското производство, како најзастапена гранка во струмичкиот регион, во 2025 година поминало над досегашните очекувања.
-Раноградинарското остварено производство на компир и зелка во однос на 2024 година бележи раст од 10 отсто додека кај дињата и лубеницата е забележан раст од 8 отсто во однос на 2024 година. Кога станува збор за производството на краставици, домати и пиперка-куртова капија треба да се напомене дека покрај забележаниот раст од приближно 12 отсто кај наведените култури, во тековната 2025 година е забележан тренд на зголемено производство во заштитен простор што резултира со пораст на вкупното производство, оценија од ресорното Министерство.
Додаваат дека согледувајќи ја целокупната ситуација на терен и во непосредни разговори со земјоделските производители, за очекување е оваа тенденција на раст да продолжи и во 2026 година.
Инаку, и годинава градинарските култури од струмичкиот регион се очекува да се извезуваат на пазарите во Хрватска, Србија, Романија, Бугарија, Грција, Скандинавија и во други земји, а покрај странците големи количини треба да откупат и домашните фабрики, информира МИА.
