На нивите на младиот Никола Ќиров секој ден е работно, по органската пиперка на ред дојде садење на карфиолот, зелката и модриот патлиџан, пласман има обезбедено

Еден од земјоделските производители кои ги следиме во производството од самиот почеток на сезоната е и младиот Никола Ќиров од Кавадарци.

Неговиот избор годинава е ОРГАНСКОТО производство како дел од проектот на Агротим и Програмата за зголемување на пазарната вработливост – И.М.Е – Договорно производство на органска пиперка и други градинарски производи.

Пиперката веќе е во фаза на цвет и засега одлично напредува. Никола вели дека не е ништо тешко да се произведува органски, единствено има потреба од повеќе работна рака, односно рачно уништување на плевелите.

Ова го потврдува и советничката за органско производство Ангела Ѓеровска.

Моментално сме на насадот каде што се одгледува органска пиперка. Се работи на чистење на тревата затоа што знаеме дека во органското производство е строго забранета употребата на хербициди. Требата треба да се исчисти за да му се даде стимул на растението да напредува без застој, вели советничката за органско производство Ангела Ѓеровска.

За органската пиперка која ја насади на 3 хектари веќе има склучено договор со преработувачкиот капацитет „ЛАРС“ од Штип, а деновиве го расади и органскиот модар патлиџан на 5 декари, зелка на 2 и карфиол на 3 декари. Од ова производсво само карфиолот не може да помине како органски бидејќи се граничи со лозје кое се произведува на конвенционален начин и нема да може да се добие сертификат за органско во преод прва година.

Очекува 30 тона модар патлиџан кој ќе се користи за производство на ајвар, како и 10-15 тона органска зелка за преработка која ќе ја купи истиот откупувач.

Преку Агротим продолжуваме да го следиме неговото производство и посакуваме да го послужи времето, да го добие очекуваниот род, да има добар профит од производството, а во државата зголемено производство на органски земјоделски култури и преработки.

За сите земјоделци уште потсетувањето дека во тек се 2 јавни огласи за земја над 3 ха и можност да се добие земја за органско производство.

Повеќе информации на Агротим.мк, а доколку имате дополнителни прашања или планирате да аплицирате за земја, ИПАРД и други повици, пишете на [email protected].