Претставници на здружението „Млад сточар“ вчера одржаа работни состаноци со заменик директорот на Агенцијата за финансиска поддршка на земјоделството и руралниот развој, Рамзи Абдуллахи и заменик директорот на Агенцијата за храна и ветеринарство, Бесник Елези.
На состаноците претставниците на „Млад сточар“, претседателот Иван Петров и секретарите Насер Џемаили и Даниел Пешов, покрај разговорите за тековните проблеми со кои се соочуваат сточарите, исплатата на субвенциите и другите јавни повици на Агенциите, побараа од Агенцијата за храна и ветеринарство да се олесни постапката за регистрирање на мандри и да се започне постапка за регистрација и формирање на каталог на домашни видови млечни производи (сирење кашкавали и слично), според подрачјата каде што се произведуваат (малешевско, шарско, галичко, мариовско), нивно брендирање со точно утврдени правила на производство и хемиско прехранбен состав, боја, форма, структура, мекост, со што по утврдениот каталог ќе знаеме кој, што и колку се произведува во државата.
Од Агенцијата за финансиска поддршка побараа воведување на нови субвенции за произведен и продаден брендиран млечен производ, помош при промоција на македонскиот пазар преку фестивал на македонското домашно сирење и други млечни производи, како и други настани и манифестации, со што би се поттикнале младите луѓе да основаат семејни бизниси за производство на домашен брендиран млечен производ.
