Благите временски услови и врнежите во текот на јануари 2022 година во поголемиот дел од Европа беа погодни за зимските култури. Меѓутоа, поради отсуството на пониски температури, адаптацијата на ниски температури и мраз е слаба, што особено се одрази во регионот на Црното Море, се вели во најновото издание на билтенот JRC MARS Bulletin – Мониторинг на посевите во Европа за јануари.
За оние кои се посеале подоцна, ваквите услови им помогнале во развојот скоро да ги стигнат оние кои биле посеани во оптималниот период. Значително е зголемувањето на површините засеани со маслодајна репка, особено во Франција и Германија.
Што се однесува до житните култури, површините под нив останаа речиси исти како лани.
Топло и суво време
Во соопштението се наведува дека поради благата зима во јануари не е изградена толеранција на растенијата на ниски температури и мраз, освен во северните и централните делови на Европа. Проблемот може да се појави во регионот на Црното Море, кој е од особено значење како „светска житница“. Снежната покривка беше тенка и брзо се стопи. Наглото заладување доведе до голомразица, а на посевите кои се подоцна посеани можат да се појават штети.
Медитеранскиот регион страда од недостиг на дожд, особено подрачјето на Шпанија, што негативно се одразува на зимските култури.
За периодот од 1 декември 2021 до 15 јануари 2022 година, метеоролошката анкета наведува дека било малку постудено на југот на Скандинавија и на Балтикот, додека во северна Скандинавија, Финска и Естонија бројот на денови со температури под нулата бил нешто поголем од вообичаено.
Во другите делови на Европа беше топло, но, како што нагласуваат во билтенот, јужните области страдаат од суша и недостаток на врнежи, освен во Шпанија и во северозападна Италија.
Што нѐ очекува следните три месеци?
Според симулациските модели, до 15 јануари немало штети од мраз. Толеранцијата на мраз е добро развиена кај земјоделските култури во северна и делови од Централна Европа, а најизразена е во Шведска и Финска, Балтикот, дел од Полска и Северна Украина.
До 27 јануари се очекува студен воздух да протекува над Источна Европа и Источниот Медитеран, кој ќе донесе интензивни врнежи.
Потопло време од просекот за овој период од годината се предвидува за следните три месеци (февруари, март и април), а сушата ќе биде поизразена во западниот дел.
