Кочани е нашиот град на оризот. Низ годините наназад, одгледувањето на оризот во овој крај, освен како земјоделска гранка прерасна во своевиден култ кон оваа култура.
Токму затоа, министерот за земјоделство, шумарство и водостопанство Арјанит Хоџа, денеска оствари средба со градоначалникот на Кочани, Николчо Илијев на која разговараа за зајакнување на посветеноста на двете институции во правец на зголемување на производството на оризот, како култура која го обележува овој регион.
Министерот Хоџа изрази подготвеност за заедничко делување на институциите, оризопроизводителите и откупувачите во заеднички интерес.
Тие го посетија и Институтот за ориз и остварија средба со оризопроизводители, откупувачи и претставници на АД Водостопанство на која се дискутираше за актуелните состојби, проблемите и излезните решенија.
Целта на ваквите средби е да се изнаоѓаат решенија не само за годинешната реколта, туку системски да се решаваат актуелните проблеми.
Министерот Хоџа и градоначaлникот Илијев, ја посетија и компанијата Даниво чија дејност е откуп и преработка на ориз. Сопствениците и вработените го информираа министерот за капацитетот на компанијата, откупот и пласманот на оризот. Министерот Хоџа порача, ваквите успешни приказни во иднина да ги има во што поголем број!
