На вечерашната средба на јаболкопроизводителите на плоштадот во Ресен на која се договара откупната цена на конзумното јаболко, беше и новиот министер за земјоделство, шумарство и водостопанство, Арјанит Хоџа.
Заедно со градоначалникот на Општина Ресен Живко Гошаревски и пратеничката Бети Рабаџиевска им дадоа поддршка на земјоделците во нивните настојувања да имаат сигурен откуп на јаболката и цена која заеднички ќе ја договорат.
-Охрабрува вашиот заеднички настап и здружување и во тоа ја имате целата поддршка од Министерството со цел да ги постигнете вашите барања. Секако ќе имам средби и со откупувачите и ќе се обезбеди целосна институционална поддршка во текот на откупот.
„Пред стартот на новата бербена сезона на јаболката, денеска во Општина Ресен имавме прва средба со новиот министер за земјоделство, шумарство и водостопанство Арјанит Хоџа со кого разговаравме за очекуваниот откуп и барањата на овоштарите.
На средбата на која присуствуваше и пратеничката Бети Рабаџиевска Наумовска, заеднички дадовме максимална поддршка на јаболкопроизводителите за ставот околу минимална продажна цена на јаболкото, договорена од страна на задругите на јаболкопроизводителите. Заеднички го констатиравме успехот што беше постигнат оваа сезона во заштитата од град, со авионското засејување на облаците. Разговаравме околу предизвиците со кои се соочуваат пред почетокот на овогодишната берба , како и насоки на делување на Општината и институциите во интерес на овоштарите“
Напиша на ФБ , градоначалникот на Општина Ресен, Живко Гошаревски.
За вечерашната средба на јаболкопроизводителите не информира Менде Ивановски – претседател на Македонската асоцијација на земјоделски задруги во државата и претседател на управниот одбор на земјоделската задруга „Ресгруп“ од с. Волкодери, Ресен.
Работната група на јаболкопроизводителите заедно со 6 те задруги и двете здруженија на овоштари во изминативе 15 дена имавме интензивни разговори со откупувачите на јаболка. Исто така и со градоначалникот на општина Ресен г-дин Живко Гошаревски имавме две средби и дојдовме до заеднички став дека јаболкото оваа сезона не треба да се откупува со пониска цена од 15 денари. Затоа вечер ги повикуваме сите производители на јаболка на средба да заедно ја договориме продажбата. Да му објасниме дека има голема заинтересираност за откуп во моментов и дека цената на јаболкото треба да биде и повисока од 15 денари. Ќе им се пренесе ставот од задругите дека нема да склучува ни една задруга договор за јаболка со цена пониска од 15 денари – изјави за Агротим Менде Ивановски – Претседател на работната група на производителите на јаболка
