Министерот за земјоделство, Арјанит Хоџа, градоначалникот на Кавадарци, Митко Јанчев и директорoт на земјоделскиот инспекторат Зоран Шапуриќ доцна попладнево го посетија откупниот пункт „Лазово мовче“. Овде се откупува винско грозје за преработка во дестилат. Лозарите кои чекаа да го продадат својот род добија ветување дека ќе им биде откупено грозјето до последно зрно.
-Од првиот ден на оваа позиција, заедно со премиерот Заев се зафатив со решавање на проблемот со откупот на грозјето. Знаеме дека поради ковид кризата и временските услови ситуацијата со грозјето е сериозна и така пристапивме кон проблемот со откупот. Она што досега е јасно дека нема да оставиме ниту едно зрно грозје да не се прибере. Тоа е сега најважно, бидејќи грозјето не стои и нема втора шанса за негово решавање на годишниот откуп. Но штом се прибере и последното грозје седнуваме со вас лозарите и винарските визби да зборуваме и најдеме трајно решение за сигурен откуп. Оваа клутура е многугодишна, знаеме со колкави површини располагаме и согласно очекуваниот просечен род ќе се договори и откупот со винарските визби. Доволно се зборуваше само за стратегија, тоа сега ќе го направиме – им порача Хоџа на лозарите.
Лозарите ќе добијат плус 4 денари од Владата, половината до крајот на годината, половината догодина. Според одлуката донесена синоќа преку Програмата за поддршка од Ковид 19 до Нова година ќе им биде исплатена поддршка од 2 денари килограм произведено и предадено винско грозје на сите земјоделци кои се евидентирани во Единсвениот регистар на земјоделски стопанства во МЗШВ. За останатите два денари земјоделците ќе треба да аплицираат до крајт на годината, а парите ќе ги добијат догодина.
Според истата одлука на Владата, од Програмата за поддршка од КОВИД 19 по 4 денари за килограм откупено грозје ќе добијат и винарските визби. Услов за да ги добијат парите е да платат 7 денари за килограм грозје кое има до 18 шеќерни единици.
Лозарите се заблагодарија што се изнајде решение за проблемот со винското грозје, кое поради лошите временски услови визбите не го откупуваа.
Хоџа и Јанчев најавија дека од утре ќе откупува и винаријата „вардар вајнари“ (поранешна Петра) и дека лозарите не треба да стравуваат. Ќе се откупи и грозјето со помалку шеќерност од 18%.
