Познатиот актер, добитник на Оскар и долгогодишен активист за заштита на животната средина, Леонардо Дикаприо, инвестираше во две компании кои произведуваат месо во лабораторија – Aleph Farms и Mosa Meat. Износот на неговите финансиски инвестиции не е објавен, а во споменатите компании тој не е само инвеститор туку се приклучи и на советодавните одбори и стана нивни консултант.
Двете компании одгледуваат говедско месо од животински клетки, а бидејќи Дикаприо веќе долго време се залага за производство на месо без убивање животни, овој исход не ја изненади јавноста.
„Еден од најдобрите и најефикасните начини за борба против климатската криза е да се смени системот за одгледување на храна“, изјави актерот за медиумите. Тој додаде дека двете компании нудат нови методи на производство за да се задоволат глобалните потреби за говедско месо. Во исто време, тврди тој, тие решаваат некои од најголемите проблеми на сегашното индустриско одгледување на овој вид храна.
„Пресреќен сум што можам да им се придружам како консултант и инвеститор“, рече тој.
Извршниот директор на Mosa Meat, Мартин Бош е воодушевен што работи со оваа позната личност.
„Неговите напори да го направи светот подобар многу добро се вклопуваат во мисијата на нашата компанија. Мило ни е што ни се придружи. Заедно ќе се стремиме да ги снабдуваме сегашните и идните генерации со одржливо месо“, рече тој.
Во 2013 година, оваа холандска компанија го претстави првиот хамбургер направен од месо одгледувано во лабораторија користејќи клетки земени од крава, додека израелскиот Aleph Farms пред три години го претстави првиот говедски стек од лабораториско одгледување.
Исто така, Дикаприо веќе инвестираше во голем број компании кои пласираат храна во согласност со принципите за одржливост, како што е Beyond Meat. Тука е и Califia Farm со веганско млеко, производител на грисини од наут HIPPEAS и компанијата Perfect Day, која не користи храна од животинско потекло.
Се верува дека глобалната потрошувачка на месо е една од причините за климатските промени поради користење на земјиштето и емисијата на гасови, вклучувајќи го и метанот. Затоа, според некои поборници, решенијата за заштита е вештачкото произведство. Имено, глобалната потрошувачка на оваа намирница може да се зголеми за 40 до 70 проценти до 2050 година, а за да се задоволат дел од потребите, постојано се работи на развој на вештачкото.
